హైదరాబాద్: అత్తాపూర్‌ పోలీస్‌ స్టేషన్‌లో న్యాయవాదులు, పోలీసుల మధ్య చోటుచేసుకున్న వివాదం తీవ్ర చర్చనీయాంశంగా మారింది. కస్టడీలో ఉన్న నిందితుడికి వాటర్‌ బాటిల్‌తో పాటు గుట్కా ప్యాకెట్లు అందించారన్న ఆరోపణల నేపథ్యంలో వివాదం మొదలైనట్లు పోలీసులు చెబుతున్నారు
. పోలీసుల కథనం ప్రకారం.. నిందితుడికి గుట్కా ప్యాకెట్లు అందించడంపై అభ్యంతరం వ్యక్తం చేయడంతో అక్కడున్న న్యాయవాదులకు సంబంధించిన వ్యక్తులతో వాగ్వాదం జరిగినట్లు తెలుస్తోంది. దీనికి సంబంధించిన సీసీటీవీ దృశ్యాలను పోలీసులు విడుదల చేసినట్లు సమాచారం
ఇదే సమయంలో ఓ న్యాయవాది ఫోన్‌ను పోలీసులు తీసుకునేందుకు ప్రయత్నించారని, ఈ క్రమంలో తోపులాట జరిగినట్లు న్యాయవాదులు ఆరోపిస్తున్నారు. ఘటనను వీడియో తీస్తున్న మహిళా న్యాయవాది ఫోన్‌ను కూడా ఓ పోలీసు అధికారి లాక్కునేందుకు ప్రయత్నించారని, ఆమెపై ఆగ్రహంగా వ్యవహరించారని వారు మండిపడుతున్నారు. “గెట్‌ ఔట్‌” అంటూ పోలీసు అధికారి ఆగ్రహం వ్యక్తం చేసిన దృశ్యాలు వివాదానికి మరింత ఆజ్యం పోశాయి.
న్యాయవాదుల వాదన మరోలా ఉంది. న్యాయవాదులు తప్పు చేసి ఉంటే సీసీటీవీ ఆధారంగా సంబంధిత వ్యక్తులపై చట్టపరమైన చర్యలు తీసుకోవచ్చని, అయితే ఫోన్లు లాక్కోవడం, న్యాయవాదులతో తోపులాటకు దిగడం ఎందుకని వారు ప్రశ్నిస్తున్నారు. ముఖ్యంగా మహిళా న్యాయవాది చేతిలోని ఫోన్‌ను పురుష పోలీసు అధికారి తీసుకునేందుకు ప్రయత్నించడంపై వారు తీవ్ర అభ్యంతరం వ్యక్తం చేస్తున్నారు.
దీంతో అత్తాపూర్‌ పోలీస్‌ స్టేషన్‌లో జరిగిన ఈ ఘటన ఇప్పుడు “న్యాయవాదులు వర్సెస్‌ పోలీసులు” అన్న స్థాయిలో చర్చకు దారితీసింది. అసలు వివాదానికి కారణం ఏమిటి? సీసీటీవీ దృశ్యాల్లో ఏం ఉంది? ఇరువర్గాల ప్రవర్తనపై అధికారులు ఎలాంటి చర్యలు తీసుకుంటారు? అన్నది ఇప్పుడు ఆసక్తికరంగా మారింది.
Comments
Sign in with Google to comment.