ఎన్నికల సంఘంపై ఉత్తమ్ ఫైర్.. “ఓటు అధికార పార్టీ సొత్తు కాదు.. రాజ్యాంగ హక్కు”

హైదరాబాద్: ఓటరు జాబితాలు, ఎన్నికల సంఘం స్వతంత్రతపై వెలుగు చూసిన అంశాలపై మంత్రి ఉత్తమ్ కుమార్ రెడ్డి తీవ్రంగా స్పందించారు. రిఫరీపైనే అనుమానం కలిగే పరిస్థితి వస్తే అది ప్రజాస్వామ్యానికి ప్రమాదకరమని అన్నారు. ప్రజాస్వామ్య పరిరక్షణకు ఎన్నికల సంఘం స్వతంత్రతే పునాది అని పేర్కొంటూ, ఎన్నికల వ్యవస్థపై ప్రజల్లో విశ్వాసం నిలబెట్టాల్సిన బాధ్యత కేంద్ర ఎన్నికల సంఘంపై ఉందన్నారు. ఎన్నికల కమిషనర్ల ఎంపిక ప్రక్రియలో సీజేఐని ఎందుకు తొలగించారనే ప్రశ్నకు సమాధానం చెప్పాలని ఉత్తమ్ కుమార్ రెడ్డి డిమాండ్ చేశారు.

ప్రధాని సూచించిన కేంద్ర మంత్రిని కమిటీలో చేర్చడం ద్వారా బీజేపీ మెజారిటీని ఖాయం చేసుకుందన్న ఆరోపణలను ఆయన ప్రస్తావించారు. ఎన్నికల సంఘం బీజేపీ కార్యాలయం కాదని, ఓటరు జాబితా కేంద్ర ప్రభుత్వ ఆస్తి కాదని వ్యాఖ్యానించారు. ఓటు అధికార పార్టీ సొత్తు కాదని, అది ప్రతి భారతీయుడి రాజ్యాంగ హక్కు అని అన్నారు.

గోవాలో 97 మంది అర్హుల పేర్లు తుది ఓటరు జాబితాలో చేరకపోవడంపై స్పష్టత ఇవ్వాలని ఉత్తమ్ కుమార్ రెడ్డి కోరారు. చట్టబద్ధ అధికారి అర్హతను నిర్ధారించినప్పటికీ సాఫ్ట్‌వేర్ కారణంగా ఓటు హక్కు అడ్డుకుపోతే దానికి బాధ్యులెవరో ఎన్నికల సంఘం దేశ ప్రజలకు వెల్లడించాలని అన్నారు. 30 రాష్ట్రాలు, కేంద్రపాలిత ప్రాంతాల్లో 13 కోట్లకు పైగా పేర్ల తొలగింపుపై పారదర్శకత అవసరమని, పశ్చిమ బెంగాల్‌లో 22.21 లక్షల మంది పేర్ల పునరుద్ధరణకు అప్పీలు చేయడం కూడా పరిశీలించాల్సిన అంశమని పేర్కొన్నారు. ఎన్నికల తర్వాత ఓటు హక్కును పునరుద్ధరించడం కంటే పోలింగ్‌కు ముందే అర్హులైన ప్రతి ఒక్కరి హక్కును నిర్ధారించాలని ఉత్తమ్ కుమార్ రెడ్డి అన్నారు.

 ఎన్నికల కమిషనర్లు సంధు, జోషి లేవనెత్తినట్లు చెబుతున్న అభ్యంతరాలపై ఎన్నికల సంఘం సమాధానం ఇవ్వాలని డిమాండ్ చేశారు. గోవా ఘటనతోపాటు ఓటరు జాబితాల సాంకేతిక వ్యవస్థపై నిష్పాక్షిక విచారణ జరపాలని కోరుతూ, ప్రజల విశ్వాసాన్ని కోల్పోయిన ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని ఆయన డిమాండ్ చేశారు. రాజ్యాంగం, ప్రజాస్వామ్యం, ఓటు హక్కు పరిరక్షణ కోసం రాహుల్ గాంధీ ఆధ్వర్యంలో కాంగ్రెస్ పోరాటం కొనసాగిస్తుందని తెలిపారు.