నిజాం ఆభరణాలకు కొత్త చిరునామా.. 173 అపురూప నగలపై కేంద్రం కీలక కసరత్తు!

హైదరాబాద్: హైదరాబాద్ నిజాం కుటుంబానికి చెందిన అరుదైన ఆభరణాలకు కొత్త చిరునామా దక్కే అవకాశం కనిపిస్తోంది. దశాబ్దాలుగా అత్యంత కట్టుదిట్టమైన భద్రత మధ్య ఉన్న 173 అపురూప ఆభరణాలను కొత్త భవనానికి తరలించే ఏర్పాట్లపై కేంద్ర సాంస్కృతిక శాఖ కసరత్తు ప్రారంభించినట్లు సమాచారం.

వజ్రాలు, పచ్చలు, కెంపులు, ముత్యాలతో రూపొందించిన హారాలు, కంకణాలు, ఉంగరాలు, బెల్టులు, తలపాగాల ఆభరణాలు, విలువైన గడియారాలతో ఈ సేకరణ ప్రత్యేక గుర్తింపు పొందింది. ప్రపంచ ప్రఖ్యాత జాకబ్ డైమండ్ కూడా ఈ 173 ఆభరణాల్లో ఉంది.

నిజాం ఖజానా నుంచి కేంద్ర ప్రభుత్వ అధీనంలోకి..

 అసఫ్‌జాహీ పాలకుల కాలంలో రాజభవన సంపదలో భాగమైన ఈ ఆభరణాలు అనంతరం నిజాం కుటుంబ ట్రస్టుల అధీనంలోకి వెళ్లాయి. 1970లలో వీటి భవిష్యత్తుపై వివాదం మొదలై సుదీర్ఘ న్యాయపోరాటానికి దారితీసింది. చివరకు సుప్రీంకోర్టు ఆదేశాల నేపథ్యంలో కేంద్ర ప్రభుత్వం 173 ఆభరణాలను కొనుగోలు చేసింది.

రూ.180 కోట్లకుపైగా.. చారిత్రక సంపదకు కేంద్రం భారీ చెల్లింపు

 1994లో సుప్రీంకోర్టు 173 ఆభరణాల కొనుగోలుకు కేంద్రానికి మార్గం సుగమం చేసింది. కోర్టు రికార్డుల ప్రకారం, ఆభరణాల ధరను రూ.180.37 కోట్లుగా నిర్ణయించడంతో పాటు 6 శాతం వడ్డీ చెల్లించాలని ఆదేశించింది. ఈ ప్రక్రియతో ఆభరణాలు కేంద్ర ప్రభుత్వ యాజమాన్యంలోకి వచ్చాయి.

ముంబై నుంచి ఢిల్లీకి.. ప్రదర్శనకు మాత్రం అరుదుగానే!

 కేంద్రం స్వాధీనం చేసుకున్న తర్వాత ఆభరణాలు తొలుత ముంబైలోని ఆర్‌బీఐ వాల్ట్‌లో భద్రపరిచినట్లు న్యాయ రికార్డుల్లో ఉంది. అనంతరం ఢిల్లీకి తరలించారు. జాతీయ మ్యూజియంలో కొన్ని సందర్భాల్లో ప్రజల సందర్శనకు ప్రదర్శించారు. దేశ సాంస్కృతిక వారసత్వంగా వీటిని సంరక్షించి ప్రజలకు అందుబాటులో ఉంచాలన్న ఉద్దేశం కేంద్రం కొనుగోలు ప్రక్రియలోనే నమోదైంది.

హైదరాబాద్‌కు తిరిగొస్తాయా?

ఆసక్తికరంగా మారిన పరిణామాలు దశాబ్దాలుగా దేశ రాజధానిలో భద్రపరిచిన నిజాం ఆభరణాలకు ఇప్పుడు కొత్త భవనం ఏర్పాటు చేసే అంశం తెరపైకి రావడం ఆసక్తి రేపుతోంది. హైదరాబాద్‌కు శాశ్వతంగా తరలింపుపై తుది నిర్ణయం వెలువడిందా? కొత్త భవనం ఎక్కడ ఏర్పాటు కానుంది? ప్రజల సందర్శనకు ఈ అపురూప సంపదను ఎలా అందుబాటులోకి తీసుకురానున్నారు? అనే అంశాలపై అధికారిక ప్రకటన కోసం ఆసక్తి నెలకొంది.