ఇంద్రకీలాద్రిపై భక్తులకు చల్లని మజ్జిగ, తాగునీటి పంపిణీ

ఎండల తీవ్రతను దృష్టిలో ఉంచుకుని ఇంద్రకీలాద్రికి విచ్చేసే భక్తుల సౌకర్యార్థం శ్రీ దుర్గా మల్లేశ్వర స్వామి వారి దేవస్థానం ప్రత్యేక ఏర్పాట్లు చేపట్టింది. ఆలయ కార్యనిర్వహణాధికారి (ఈవో) మరియు స్పెషల్ గ్రేడ్ డెప్యూటీ కలెక్టర్ వి.కె. శీనా నాయక్ ఆదేశాల మేరకు, వేసవి కాలం ముగిసే వరకు భక్తులకు ఉచిత తాగునీరు మరియు చల్లని మజ్జిగ పంపిణీ కార్యక్రమంను విస్తృతంగా అమలు చేస్తున్నారు. దేవస్థానం తరఫున ప్రతిరోజూ కొండపైకి వచ్చే భక్తుల దాహార్తిని తీర్చేందుకు నిరంతర ఉచిత తాగునీటి సదుపాయం కల్పించారు. అదేవిధంగా, ఉగాది పర్వదినం నుంచి జూన్ 15వ తేదీ వరకు నిరంతరాయంగా మజ్జిగ పంపిణీ కొనసాగించనున్నట్లు అధికారులు తెలిపారు. సాధారణ రోజుల్లో ప్రతిరోజూ 2,000 మజ్జిగ ప్యాకెట్లు పంపిణీ చేయనున్న దేవస్థానం, భక్తుల రద్దీ అధికంగా ఉండే శుక్రవారం, శనివారం, ఆదివారం రోజుల్లో 5,000 మజ్జిగ ప్యాకెట్లు లేదా అంతకంటే ఎక్కువ పంపిణీ చేసేలా ప్రత్యేక ఏర్పాట్లు చేసింది. ఈ సేవా కార్యక్రమంలో భాగస్వాములు కావాలనుకునే దాతలు రోజుకు కేవలం రూ.650 చెల్లించి, అధికారిక రశీదు పొంది ఈ పథకానికి విరాళం అందించవచ్చని ఈవో వి.కె. శీనా నాయక్ తెలిపారు. వేసవిలో అమ్మవారి దర్శనానికి వచ్చే భక్తులకు ఎలాంటి అసౌకర్యం కలగకుండా దేవస్థానం ఈ నిర్ణయం తీసుకుందని పేర్కొన్న ఆయన, ఈ సేవా కార్యక్రమాన్ని ప్రజల్లోకి తీసుకెళ్లాలని పత్రికా ప్రతినిధులను కోరారు. అలాగే, అధిక సంఖ్యలో దాతలు ముందుకు వచ్చి ఈ పుణ్యకార్యంలో భాగస్వాములు కావాలని విజ్ఞప్తి చేశారు.