వినాయకుడి లడ్డూ కోసం రూ.1.45 లక్షలు.. ముస్లిం దంపతుల సంచలన నిర్ణయం!

ధర్మవరం: ఆంధ్రప్రదేశ్‌లో మత సామరస్యాన్ని చాటే ఆసక్తికర ఘటన చోటుచేసుకుంది. శ్రీసత్యసాయి జిల్లా ధర్మవరం పట్టణంలోని పార్థసారథి నగర్ సమీపంలో ఏర్పాటు చేసిన వినాయకుడి విగ్రహం వద్ద లడ్డూ ప్రసాదానికి నిర్వహించిన వేలంపాటలో ముస్లిం దంపతులు పాల్గొని ప్రత్యేకంగా నిలిచారు. వేలంపాటలో చాందిని, మస్తాన్ వలి దంపతులు రూ.1,45,000లకు వినాయకుడి లడ్డూ ప్రసాదాన్ని దక్కించుకున్నారు.

 భారీ మొత్తానికి లడ్డూను సొంతం చేసుకోవడంతో అక్కడున్న భక్తులు, స్థానికుల దృష్టిని ఈ దంపతులు ఆకర్షించారు. మత భేదాలకు అతీతంగా వినాయకుడి లడ్డూ వేలంలో పాల్గొని ప్రసాదాన్ని దక్కించుకోవడం స్థానికంగా చర్చనీయాంశంగా మారింది

. ఈ ఘటనను పలువురు మత సామరస్యానికి, సోదరభావానికి ప్రతీకగా పేర్కొంటున్నారు. వినాయక చవితి వేడుకల సందర్భంగా జరిగిన ఈ వేలంపాటలో ముస్లిం దంపతులు రూ.1.45 లక్షలు వెచ్చించడం ప్రస్తుతం ధర్మవరంలో హాట్ టాపిక్‌గా మారింది.

 ఈ ఘటనకు సంబంధించిన వివరాలు సోషల్ మీడియాలోనూ వైరల్ అవుతున్నాయి. మతాలు వేరైనా.. మనసులు ఒక్కటేనని చాటిన ధర్మవరం ఘటన ఇప్పుడు అందరి దృష్టిని ఆకర్షిస్తోంది.