వినాయకుడిని చూడటానికి వెళ్లిన భక్తులకు అక్కడ కనిపించిన దృశ్యం ఒక్కసారిగా షాక్‌కు గురిచేసింది! బప్పా కిరీటం నుంచి మెడలోని మాల వరకు ఎక్కడ చూసినా కరెన్సీ నోట్లే! తెలంగాణలోని పాల్వంచలో రెండు గణపతి విగ్రహాలను ఏకంగా రూ.2.90 కోట్ల విలువైన నోట్లతో అలంకరించడం ఇప్పుడు సోషల్ మీడియాలో దుమారం రేపుతోంది.
భద్రాద్రి కొత్తగూడెం జిల్లా పాల్వంచలో కాపు కమ్యూనిటీ ఆధ్వర్యంలో ఏర్పాటు చేసిన గణపతిని రూ.1.40 కోట్ల నోట్లతో ముస్తాబు చేశారు. మరోవైపు ‘టీమ్ ఏకదంతా యూత్’ ఏర్పాటు చేసిన గణనాథుడిని రూ.1.50 కోట్ల విలువైన కరెన్సీ నోట్లతో అలంకరించారు.
పూలు కాదు.. పండ్లు కాదు.. ఏకంగా కోట్ల రూపాయల నోట్లు! గణపతి కిరీటం, హారం, మండపం చుట్టూ నోట్లతో చేసిన అలంకరణ ప్రత్యేక ఆకర్షణగా మారింది. స్థానిక వ్యాపారులు, భక్తుల సహకారంతో బ్యాంకుల నుంచి సేకరించిన కరెన్సీ నోట్లను అలంకరణలో ఉపయోగించినట్లు సమాచారం.
ఈ ‘కరెన్సీ గణపతి’కి సంబంధించిన ఫొటోలు, వీడియోలు సోషల్ మీడియాలో వైరల్‌గా మారడంతో పాల్వంచ పేరు ఒక్కసారిగా ట్రెండింగ్‌లోకి వచ్చింది. బప్పాను చూసేందుకు వచ్చే భక్తుల కంటే.. నోట్ల అలంకరణను చూసేందుకు ఆసక్తి చూపుతున్నవారే ఎక్కువగా కనిపిస్తున్నారంటూ నెటిజన్లు కామెంట్లు చేస్తున్నారు.
ఇదే సమయంలో వరంగల్ శివనగర్‌లోనూ రూ.1.91 కోట్ల విలువైన కరెన్సీ నోట్లతో గణేష్ మండపాన్ని అలంకరించినట్లు సమాచారం. దీంతో ఈ ఏడాది తెలంగాణలో వినాయక చవితి వేడుకల్లో ‘కరెన్సీ గణపతి’ అలంకరణలు ప్రత్యేక వైరల్ టాపిక్‌గా మారాయి.
Comments
Sign in with Google to comment.