తెలంగాణ నుంచి కాంగ్రెస్ పార్టీ తరఫున రాజ్యసభకు అభిషేక్ మను సింఘ్వీ మరియు వేం నరేందర్ రెడ్డి నామినేషన్లు దాఖలు చేశారు. అసెంబ్లీ కార్యాలయంలో ఎన్నికల అధికారి ఉపేందర్ రెడ్డికి వారు నామినేషన్ పత్రాలు సమర్పించారు. సింఘ్వీ మూడు సెట్ల నామినేషన్లు దాఖలు చేయగా, వేం నరేందర్ రెడ్డి నాలుగు సెట్లు సమర్పించారు. ఇండిపెండెంట్ అభ్యర్థి సాయి ఒకే సెట్తో నామినేషన్ దాఖలు చేశారు. ఈ సందర్భంగా ముఖ్యమంత్రి రేవంత్ రెడ్డి, మంత్రులు, ఎమ్మెల్యేలు పెద్ద సంఖ్యలో హాజరయ్యారు. రాజ్యసభ ఎన్నికల నామినేషన్ ప్రక్రియ ముగియగా, 10 మంది ఎమ్మెల్యేల మద్దతు సంతకాలు లేకుండా ఇండిపెండెంట్ అభ్యర్థి దాఖలు చేసిన నామినేషన్ తిరస్కరణకు గురయ్యే అవకాశం ఉంది. ప్రధాన ప్రతిపక్షం బీఆర్‌ఎస్ అభ్యర్థిని బరిలో నిలపకపోవడంతో అభిషేక్ మను సింఘ్వీ మరియు వేం నరేందర్ రెడ్డి ఎన్నిక ఏకగ్రీవంగా ఖరారు కానుంది. ఇప్పటికే తెలంగాణ నుంచి రాజ్యసభ సభ్యుడిగా ఉన్న సింఘ్వీ పదవీకాలం ముగియనున్న నేపథ్యంలో, కాంగ్రెస్ అధిష్ఠానం ఆయనకు మరోసారి అవకాశం కల్పించింది. మరో స్థానానికి తీవ్ర పోటీ నెలకొన్నప్పటికీ, చివరికి వేం నరేందర్ రెడ్డికి పార్టీ టికెట్ దక్కింది.
Comments
Sign in with Google to comment.