న్యూఢిల్లీ: ఢిల్లీలో ఓటర్ల జాబితాల ప్రత్యేక సమగ్ర సవరణ (SIR) ప్రక్రియలో హైప్రొఫైల్ ఓటర్ల పేర్లు మరోసారి చర్చనీయాంశంగా మారాయి. బీజేపీ సీనియర్ నేత ఎల్‌కే అద్వానీ, మాజీ ఉపరాష్ట్రపతి జగ్‌దీప్ ధన్‌ఖడ్, విదేశాంగ మంత్రి ఎస్. జైశంకర్, ఢిల్లీ సీఎం రేఖా గుప్తా, మాజీ సీఎం అరవింద్ కేజ్రీవాల్ సహా పలువురు ప్రముఖులకు ఎన్నికల అధికారులు నోటీసులు జారీ చేశారు.
2002లోని పాత SIR ఓటర్ల జాబితాతో వివరాలు సరిపోలని కారణంగా వీరిలో పలువురిని ఫీల్డ్ వెరిఫికేషన్‌కు గుర్తించారు. అనంతరం బూత్ స్థాయి అధికారులు వారి నివాసాలకు వెళ్లి, ఎన్నికల సంఘం సూచించిన పత్రాల ఆధారంగా వివరాలను పరిశీలించారు.
ఆగస్టు 31న విడుదలైన ముసాయిదా ఓటర్ల జాబితాలో పేర్లు కనిపించని నేపథ్యంలో నోటీసులు జారీ అయ్యాయి. ఢిల్లీలోని ముసాయిదా జాబితాలో 97 లక్షలకుపైగా ఓటర్లు ఉండగా, వివరాల్లో తేడాలు ఉన్నట్లు గుర్తించిన సుమారు 33.13 లక్షల మందికి నోటీసులు ఇచ్చినట్లు అధికారులు తెలిపారు.
అయితే నోటీసు అందుకోవడం అంటే ఓటరు పేరు తొలగించినట్లు కాదని ఢిల్లీ ప్రధాన ఎన్నికల అధికారి కార్యాలయం స్పష్టం చేసింది. ప్రతి ఓటరుకు తన వాదనను వినిపించే అవకాశం కల్పించిన తర్వాత, కారణాలతో కూడిన ఆదేశాలు జారీ చేయాల్సి ఉంటుందని తెలిపింది.
ఫీల్డ్ వెరిఫికేషన్ పూర్తయిన ప్రముఖ ఓటర్ల పేర్లను తుది జాబితాలో చేర్చే ప్రక్రియ కొనసాగుతోంది. ఢిల్లీలో SIRపై రాజకీయంగా, ప్రజల్లో ఆసక్తి పెరుగుతున్న వేళ.. నవంబర్ 4న వెలువడనున్న తుది ఓటర్ల జాబితాపై ఇప్పుడు అందరి దృష్టి నెలకొంది.
Comments
Sign in with Google to comment.