ఆదిలాబాద్‌ రిమ్స్‌ ఆసుపత్రిలోని ఎస్‌ఎన్‌సీయూ (SNCU) వార్డులో చోటుచేసుకున్న అగ్నిప్రమాదం తీవ్ర విషాదాన్ని మిగిల్చింది. ఈ ఘటనలో ఇద్దరు చిన్నారులు మృతి చెందడంపై ముఖ్యమంత్రి ఎ. రేవంత్ రెడ్డి తీవ్ర విచారం వ్యక్తం చేశారు. చిన్నారుల మృతి అత్యంత బాధాకరమని సీఎం పేర్కొన్నారు. మృతుల కుటుంబాలకు ప్రగాఢ సానుభూతి తెలిపారు.
ఆసుపత్రిలో చికిత్స పొందుతున్న మిగిలిన చిన్నారులకు ఎలాంటి ఇబ్బంది కలగకుండా మెరుగైన వైద్యం అందించాలని అధికారులను ఆదేశించారు. చికిత్స పొందుతున్న చిన్నారుల ఆరోగ్య పరిస్థితిని వైద్యులు నిరంతరం పర్యవేక్షించాలని సీఎం స్పష్టం చేశారు. అవసరమైన అన్ని వైద్య సదుపాయాలను తక్షణమే అందుబాటులో ఉంచాలని సూచించారు.
అగ్నిప్రమాదానికి అసలు కారణాలను వెలికితీసేందుకు సమగ్ర విచారణ జరిపి నివేదిక సమర్పించాలని అధికారులను రేవంత్ రెడ్డి ఆదేశించారు. ఘటనలో నిర్లక్ష్యం లేదా భద్రతా లోపాలు ఏమైనా ఉన్నాయా అనే అంశాన్ని కూడా పరిశీలించాలని సూచించారు.
భవిష్యత్తులో ఇలాంటి విషాద ఘటనలు పునరావృతం కాకుండా రాష్ట్రంలోని అన్ని ఆసుపత్రుల్లో అగ్నిమాపక, విద్యుత్‌, ఇతర భద్రతా చర్యలను పటిష్టం చేయాలని సీఎం ఆదేశించారు.
Comments
Sign in with Google to comment.